Question au clerc du guichet [Ballade de l'appel]
Que dictes vous de mon appel,
Garnier, fis je sens ou folie ?
Toute beste garde sa pel :
Qui la contraint, efforce ou lie,
S'elle peult, elle se deslie.
Quant dont, par plaisir voluntaire
Chanté me fut ceste omelie,
Estoit il lors temps de moy taire ?
Se fusse des hoirs Hue Capel
Qui fut extrait de boucherie,
On ne m'eust parmy ce drapel
Fait boire en cest escorcherie
- Vous entendez bien joncherie -.
Mais quant ceste paine arbitraire
On me juga par tricherie,
Estoit il lors temps de moy taire ?
Cuydiés vous que soubz mon capel
N'eust autant de philosophie
Comme de dire «J'en appel» ?
Si avoit, je vous certifie
- Combien que point trop ne m'y fie -
Quant dit me fut, present notaire,
« Pendu serrés », je vous affie,
Estoit il lors temps de moy taire ?
Prince, se j'eusse eu la pepie,
Pieçà fussë ou est Clotaire :
Aux champs debout comme une espie...
Estoit il lors temps de moy taire ?