Rencontré soit des bestes feu gectans
Que Jason vit, querant la toison d'or,
Ou transmué d'omme en beste sept ans
Ainsi que fut Nabougodonosor,
Ou il ait guerre et perte aussi villaine
Que Troies ot pour la prise d'Elayne,
Ou mis de fait soit avec Tantalus
Et Proserpine es infernaulx palus,
Ou plus que Job soit en griefve souffrance,
Tenant prison en la tour Dedalus,
Qui mal voudroit au royaume de France !

Quatre mois soit en ung vivier chantans,
La teste au fons ainsi que le butor,
Ou au Grant Turcq vendu deniers contans
Pour estre mis au harnoys comme ung tor,
Ou trente ans soit, comme Magdelaine,
Sans drap vestir de linge ne de layne,
Ou soit noié comme fut Narcisus,
Ou aux cheveulx, comme Absalon pendus
Ou com Judas fut par Desesperance,
Ou puist mourir comme Simon Magus,
Qui mal voudroit au royaume de France !

D'Octovïen puist revenir le temps,
C'est qu'on luy coulle ou ventre son tresor,
Ou qu'il soit mis entre meulles flotans
En ung moulin, comme fut saint Victor,
Ou transglouty en la mer, sans alaine,
Pis que Jonas ou corps d'une baleine,
Ou soit bany de la clarté Phebus,
Des biens Juno et du solas Venus,
Et du dieu Mars soit pugny a oultrance
Ainsy que fut roy Sardanapalus,
Qui mal voudroit au royaume de France !

Prince, porté soit des serfs Yolus
En la forest ou domine Gloucus
Et soit privé soit de paix et d'esperance,
Car digne n'est de possider vertus
Qui mal voudroit au royaume de France !