Qu'est ce que j'oy ? - Ce suis je. - Qui ? - Ton cueur,
Qui ne tient mais qu'a ung petit filet.
Force n'ay plus, substance ne liqueur,
Quant je te voy retrait ainsi seulet,
Com povre chien tapi en reculet.
- Pour quoy est ce ? - Par ta folle plaisance.
- Que t'en chault il ? - J'en ay la deplaisance.
- Laisse m'en paix ! - Pour quoy ? - G'y penseray.
- Quant sera ce ? - Quant seray hors d'enfance.
- Plus ne t'en dis. - Et je m'en passeray.

- Que penses tu ? - Estre homme de valeur.
- Tu as trente ans ! - C'est l'aage d'un mulet.
- Est ce enfance ? - Nennil. - C'est donc folleur
Qui te sasist ? - Par ou ? Par le collet ?
- Rien ne congnois. - Si faiz. - Quoy ? - Mousche en lait:
L'ung est blanc, l'autre noir. C'est distance.
- Est ce donc tout ? - Que veulx tu que je tence ?
Se n'est assez, je recommenceray.
- Tu es perdu ! - G'y mettray resistance.
- Plus ne t'en dis. - Et je m'en passeray.

- J'en ay le dueil, toy le mal et douleur.
Se feusse ung povre ydiot et folet,
Encore eusses de t'excuser couleur ;
Si n'as tu soing. Tout t'est ung, bel ou lait.
Ou la teste as plus dure q'un jalet,
Ou mieulx te plaist qu'onneur ceste meschance :
Que respondras a ceste consequence ?
- J'en seray hors quant je trepasseray.
- Dieu ! Quel confort ! Quelle sage eloquence !
Plus ne t'en dis. - Et je m'en passeray.

- Dont vient ce mal ? - Il vient de mon mal eur :
Quant Saturne me fist mon fardelet,
Ses motz y mist, je le croy. - C'est foleur :
Son seigneur es, et te tiens son varlet !
Voy que Salmon escript en son rolet :
« L'homme sage, ce dit il, a puissance
Sur planetes et sur leur influence.»
- Je n'en croy riens : tel qu'il m'ont fait seray.
- Que dis tu dea ? - Certes, c'est ma creance.
- Plus ne t'en dis. - Et je m'en passeray.

- Veulx tu vivre ? - Dieu m'en doint la puissance !
- Il te fault. - Quoy ? - Remors de conscïence,
Lire sans fin. - En quoy ? - Lire en scïence,
Laisser les folz. - Bien j'y adviseray.
- Or le retien ! - J'en ay bien souvenance.
- N'attens pas trop, qu'il ne tiengne a plaisance !
Plus ne t'en dis. - Et je m'en passeray.