Ballade des seigneurs du temps jadis
Qui plus, ou est ly tiers Calixte,
Derrenier decedé de ce nom,
Quy quatre ans tint le papalixte ?
Alfonce le roy d'Arragon,
Le gracïeux duc de Bourbon,
Et Artus le duc de Bretaigne,
Et Charles septiesme le bon ?
Mais ou est le preux Charlemaigne ?
Semblablement, le roy scotiste
Qui demy face ot, ce dit on,
Vermaille comme une emastiste
Depuis le front jusqu'au menton,
Le roy de Chippre de renom,
Helas ! et le bon roy d'Espaigne
Duquel je ne sçay pas le nom ?
Mais ou est le preux Charlemaigne ?
D'en plus parler je me desiste,
Le monde n'est qu'abusïon ;
Il n'est qui contre mort resiste
Ne qui treuve provisïon.
Encore faiz une questïon :
Lancellot, le roy de Behaygne,
Ou est il ? Ou est son tayon ?
Mais ou est le preux Charlemaigne ?
Ou est Clacquin le bon Breton,
Ou est le conte daulphin d'Auvergne,
Et le bon feu duc d'Alençon ?
Mais ou est le preux Charlemaigne ?