Fortune fuz par cleirs jadiz nommee,
Que toy, Françoys, crye et nomme murtriere,
Qui n'est homme d'aucune renomee.
Meilleur que toy faiz user en plastriere,
Par povreté, et fouyr en carriere :
S'a honte viz, te dois tu doncques plaindre ?
Tu n'es pas seul ; si ne te dois complaindre ;
Regarde et voy, de mes fais de jadiz,
Mains vaillans homs par moy mors et roiddiz,
Et n'es, ce sais, envers eulx ung soullon.
Appaise toy et mect fin en tes diz,
Par mon conseil prens tout en gre, Villon !

Contre grans roys me suis bien anymee
Le temps qui est passé ça en arriere :
Priame occis et toute son armee,
Ne lui valut tour, donjon ne barriere.
Et Hannibal demoura il derriere ?
En Cartaige par Mort le feiz actaindre,
Et Scypïon l'Affrequain feiz estaindre.
Julius Cesar au Senat je vendiz.
En Egipte Pompee je perdiz,
En mer noyay Jazon en ung bouillon
Et une foys Romme et Rommains ardiz.
Par mon conseil prens tout en gre, Villon !

Alixandre, qui tant fist de hemee,
Qui voulut veoir l'estoille poucyniere,
Sa personne par moy fut envelimee.
Alphasar roy en champ sur sa baniere
Ruay jus mort. Cela est ma maniere :
Ainsi l'ay fait, ainsi le maintendray,
Autre cause ne raison n'en rendray.
Holofernés l'idolastre mauldiz,
Qu'occist Judic - et dormoit entandiz -
De son poignart dedens son pavillon.
Absallon, quoy ? en fuyant le pendis.
Par mon conseil prens tout en gre, Villon !

Pour ce, Françoy, escoute que te dis :
Se riens peusse sans Dieu de Paradiz,
A toy n'autre ne demourroit haillon,
Car pour ung mal lors j'en feroye dix.
Par mon conseil prens tout en gre, Villon !